لو نفسك في حاجة حلوة وسريعة ومش عايزة تفتحي الفرن أو تقضي وقت طويل في المطبخ جربي بسبوسة الطاسة اللي بتتعمل على البوتجاز في 10 دقايق بس و طعمها ولا أروع! الوصفة دي سهلة اقتصادية ومكوناتها بسيطة ومتوفرة في كل بيت وكمان النتيجة مبهرة من أول مرة.
المكونات:
- كوب سميد (دقيق بسبوسة ناعم)
- نص كوب سكر
- نص كوب زبادي أو لبن رايب
- 2 ملعقة كبيرة جوز هند (اختياري)
- 1/4 كوب زيت نباتي
- نصف ملعقة صغيرة بيكنج بودر
- رشة فانيليا
- شربات (سيرب) بارد – كوب سكر + نص كوب ماء + عصرة ليمون
طريقة التحضير
- في بولة، اخلطي السميد مع السكر البيكنج بودر الفانيليا وجوز الهند.
- أضيفي الزيت والزبادي وقلبي الخليط كويس لحد ما يبقى ناعم ومتجانس.
- سخني طاسة غير لاصقة تيفال أو جرانيت على نار هادية جدا وادهنيها نقطة زيت أو قطعة زبدة صغيرة.
- صبي الخليط في الطاسة وافرديه كويس باستخدام الملعقة.
- غطي الطاسة واتركي البسبوسة على نار هادية جدًا لمدة 7 – 10 دقايق لما تلاحظي إن الجوانب نشفت واللون بدأ يتغير قلبيها على الوجه التاني (ممكن باستخدام طبق).
- اتركي الوجه التاني ياخد لون دهبي خفيف كمان 3 – 5 دقايق.
طريقة الشربات (القطر):
- في حلة صغيرة ضيفي السكر والماء وعصرة ليمون وسيبيهم يغلو 5 دقايق على نار متوسطة لحد ما القوام يتقل شوية.
- اسقي البسبوسة بالشربات وهي سخنة ويفضل إن الشربات يكون بارد.
أفكار للتزيين
- ممكن ترشي شوية فستق أو جوز هند على الوش.
- قدميها مع كوب شاي أو قهوة هتبقى تحفة!
جربي بسبوسة الطاسة في 10 دقايق هتعجب ولادك وجوزك وهتكون من الوصفات السريعة اللي تعتمدي عليها لما تبقي محتارة تعملي حاجة حلوة وسهلة والأحلى إنها من غير فرن وطعمها كأنها طالعة من أشهر حلواني.